PLUMA'Y UMAANLONG

Manlapud Wikipedia
Jump to navigation Jump to search

Ag ko la nipoger manlebboan liknaan
Manyesyes ed segao, liket tan tamitam
Ay! Naambagel ak no ag ko nibesngao
Mantalogaba la’y plumak ed pangaoan.


Mandaldalamurom la ra ‘ma’y mumusia
Kamayer na pusok so ilaineng da
Ta pialagar da’y kibolos na pluma
Pilatek na korit, sokbot na linaoa.


Ay! no ag met suplon ya’y nonot tan likna!
Ya miamamotan ed mimiambegya
No ag ko paskaren so onia ran oalna
Ag onagos so lua’y maliket kon pluma.


Natan ko asibar so liknan maamot
Ya dinegkeman ko’y ikol ton makibot
Natan ko ganganen ya andi pasoot
Okbara’y plumak pian bilay to’y nasambot.


Say dalagereg da’y sali ra’y mumusia
Nen akabatan dan pluma’y nankanaoa
Ingapo ra’y sayao ed igsan mapalna
Et diad anieoeng to layag so manoaoa.


Mankuyab, mankiteb so plumak ya nablos
Kampo da ra’y musia nakar ton dinagos
Eyag da’y makabuek uni ra’y onaplos
Inoaklit to’y baing, dima’y dinalolos.


Inkompas to’y sali’d sayao kindokindo
Ondepan onkioel taklay tan lima to
Bang saramay musia ibalap day ritmo
Bansaga’y laineng so liknan mansasbo.


Dogalen day tambol ed konsag da’y sali
Dagdagen da’y pluman onsayao, onkioi
Iopot to’y oalan inatol ton singi
Daege’y bilonget ed pegley na labi.


No arum say plumak nabalang ed ritmo
Aliling to’y ugao ka’kapanpakso to
Balet say miayam ed musia’y bonek to
Manlinget ma’y dala siansian ag onsoko.


Kutibeng, tulali, ayongoong, tambol
Ibalap da’y sayao ed samit day tanol
Say plumak manoangel, manlukson manongol
Inaglon to’y alak da’y musian kanonong.


Di sayaksak, liket, gayaga tan elek
Sikaray karongon kaukob ya nanbuek
Inlingoan nen plumak si ermen tan oetoet
Impongit to ra met di irang tan siblet.


Manbolobol ira’y limman miambegya
Ed si plumak tan saray kaaron musia
Palbango’y apagal, aliing si banoa
Imbuat nen linaeo, timmandak ya bigla.


Mansungap, naksaoan ya naalimangao
Si pluman aseleng na marlang ya tingkao
Ag to la nikurang so salin nikispay
Sinigsioa da ra’y mumusian kalanglang.


Oala met manaya’y anggaa’y kaliktan
Ta si plumak lanti’y arasag na kesao
Sabalet so tindek na puson mandarlang
Ag balot manondan onotbong, onlongdao.


Manimimis ira’y mumusian kaaro
Nen si plumak singa bunga ya aloo
“Alioan sampot ya’y pandoromog tayo,
Painaoa ka ni!” say kuan dan maroyo.


Nipasag ma’d kesao si pluman malangoer
Ingapol ma’y laoan tan ka’ndia’y panteger
Gapo lambengat ya’y banyagan andokey
Ya angga’d naubol so bilay ton naskey.


Duga ni! Duga ni! Ag to makasaba
On, paleenan yo’y malangoer nin pluma
Idegkel na laman narateng ton siansia
Pian makapiando’d sipud tin Salita.


(Sept. 2, 2006)