Bolinao Skull

Say Bolinao Skull et sakey ya arkeolohikon adiskobre ya akotkot ed Balingasay Archaeological Site ed Bolinao, Pangasinan ed Pilipinas. Say Bolinao Skull et kinonsidera ya bihiran naromog lapud saray gold ya dekorasyon ed ngipen to ya singa siksik na sira. Sayan aromog ya bungo na too so angitarya na dalan parad kaaruman ya panaral ed saray ornamental, panagponpon, tan panaglakoan na saray totoo ed Pilipinas, lalo nen panaon antis na saray Kastila.

Say Bolinao Skull et adiskobre legan na panagkotkot ya indaulo na saray arkeologo manlapud National Museum of the Philippines. Say duman kabiangan to et saray dekorasyon to ed ngipen ya gawad gold. Diad Balingasay Site ed Bolinao, Pangasinan, Pilipinas, saray arkeologo et akakotkot na 67 a bungo, ya amin da et walay dekorasyon na ngipen da ed balitok tan aromog da ray tradeware ceramics ya nanlapud inmunan Ming Dynasty ed China nen manga 15th century AD. Say sukat na saray alahas et 10 milimetro so kalapar to tan 11.5 milimetro so katagey to. Say gold iran siksik et naobserbaan ya wala ed tapew na sangi na tagey tan leksab ya incisor tan saray ngipen na aso .

Anengneng ya saray ngipen et wala iray abut ya abut, ya pinano na balitok iran disk, plug, peg, odino alambre. Kada klase na alahas et walaray nikadkaduman desinyo to.